നേര്യമംഗലം: അടിമാലി–നേര്യമംഗലം ദേശീയപാതയിലെ ചീയപ്പാറ വെള്ളച്ചാട്ടം പ്രദേശത്തും സമീപപ്രദേശങ്ങളിലും കനത്ത മഴയെ തുടർന്ന് മണ്ണ് കുതിർന്ന നിലയിലായതിനാൽ മണ്ണിടിച്ചിലിനും മണ്ണ് താഴേക്ക് പതിച്ച് അപകടമുണ്ടാകുന്നതിനും സാധ്യതയുണ്ട്.

ഇതേത്തുടർന്ന് ചീയപ്പാറയിലും സമീപപ്രദേശങ്ങളിലും വാഹനങ്ങൾ നിർത്തുന്നതും സഞ്ചാരികൾ വാഹനങ്ങളിൽ നിന്ന് ഇറങ്ങുന്നതും താൽക്കാലികമായി നിരോധിച്ചു.

അപകടസാധ്യത കണക്കിലെടുത്തും ഗതാഗത തടസ്സം ഒഴിവാക്കുന്നതിനുമായി റോഡരികിൽ വാഹനങ്ങൾ നിർത്തുന്നതും വഴിയിലിറങ്ങി നിൽക്കുന്നതും പൂർണമായും ഒഴിവാക്കണമെന്ന് പോലീസ് നിർദേശിച്ചു.

നിരോധനം ലംഘിക്കുന്ന വാഹനങ്ങൾക്കും വ്യക്തികൾക്കുമെതിരെ നിയമനടപടി സ്വീകരിക്കുമെന്ന് അധികൃതർ അറിയിച്ചു.