മലിനജല സംസ്‌കരണ പ്ലാന്റില്ലാതെ നിയമവിരുദ്ധമായി പ്രവർത്തിച്ചുവന്ന ഫൈവ് സ്റ്റാർ പവർ ലോണ്ടറിയിൽ വെള്ളത്തൂവൽ ഗ്രാമപഞ്ചായത്ത് എൻഫോഴ്‌സ്‌മെന്റ് സംഘം നടത്തിയ പരിശോധനയിൽ ഗുരുതര ക്രമക്കേടുകൾ കണ്ടെത്തി. രാസവസ്തുക്കൾ കലർന്ന മലിനജലം സമീപത്തെ കുളത്തിലേക്കും തുടർന്ന് പൊതുതോട്ടിലേക്കും ഒഴുക്കിവിടുന്നതായി പരിശോധനയിൽ സ്ഥിരീകരിച്ചു.

ലോണ്ടറിയിൽ നിന്നുള്ള മലിനജലം ആദ്യം സമീപത്തെ കുളത്തിലേക്ക് ഒഴുക്കിയശേഷം റോഡ് പൊളിച്ച് സ്ഥാപിച്ച ആറിഞ്ച് വീതിയുള്ള മൂന്ന് പൈപ്പുകൾ വഴി സ്വകാര്യ വ്യക്തികളുടെ പറമ്പുകളിലൂടെ തോട്ടിലേക്ക് തള്ളിവിടുകയായിരുന്നു. എൻഫോഴ്‌സ്‌മെന്റ് ഉദ്യോഗസ്ഥർ നടത്തിയ വിശദമായ പരിശോധനയിലാണ് അനധികൃത പൈപ്പ് ലൈനുകളും പരിസ്ഥിതി മലിനീകരണവും നേരിട്ട് കണ്ടെത്തിയത്.

തോട്ടിലേക്ക് മലിനജലം ഒഴുക്കിവിടുന്നതിനായി സ്ഥാപിച്ച പൈപ്പുകൾ പൊളിച്ചുമാറ്റുമെന്ന് ഗ്രാമപഞ്ചായത്ത് അധികൃതർ അറിയിച്ചു. സ്ഥാപനത്തിന്റെ പ്രവർത്തനം അടിയന്തരമായി നിർത്തിവെക്കാൻ നോട്ടീസ് നൽകിയതായും സ്ഥാപനത്തിനെതിരെ പിഴ ചുമത്തിയതായും അധികൃതർ വ്യക്തമാക്കി.

ജനങ്ങളുടെ കുടിവെള്ള സ്രോതസ്സുകൾ മലിനമാക്കുകയും ആരോഗ്യഭീഷണി ഉയർത്തുകയും ചെയ്യുന്ന നടപടികൾക്കെതിരെ യാതൊരു വിട്ടുവീഴ്ചയുമില്ലാതെ കർശന നടപടി സ്വീകരിക്കുമെന്ന് ഗ്രാമപഞ്ചായത്ത് അധികൃതർ അറിയിച്ചു.